بعد تصريحات كريم ذكري.. أشهر اعترافات التفويت لصالح الزمالك

سادت حالة من الغضب عبر مواقع التواصل الاجتماعي بين جماهير القلعة البيضاء،  بعد تصريحات كريم ذكري، لاعب فريق الزمالك السابق بخصوص تفويت المباريات.

تحدث كريم ذكري لاعب الزمالك والمصري السابق عن وقائع تفويت في الدوري المصري خلال تواجده بقناة الزمالك في برنامج رمضاني خاص.

مباراة المصري والاتحاد

قال ذكري : “كنا بنلاعب الاتحاد السكندري وكنا مهددين بالهبوط وكنا محتاجين بنط عشان نقعد والماتش متكهرب ومش عارفين نلعب هننزل والاتحاد كان فرقة كويسة جدا وبيلاعبونا في بورسعيد، ضربة جزاء اتحسبت للاتحاد السكندري هننزل خلاص، فدخل ابراهيم الشايب داخل يشوط .. وهو داخل يشوط شاور للجون بتاعنا ع الزاوية اللي هيشوط فيها ، وفعلا ايمانويل اترمى ومسكها ، بعدها قمنا احنا جايبين جون .. المفاجأة بقى أن جمهور المصري نزل شال ابراهيم الشايب، احنا معملناش حاجة شالوا ابراهيم الشايب مشالوناش احنا، كتر خيره”.

تليفونات بني سويف والمصري

وأضاف كريم ذكري: ” كنا بنلاعب تليفونات بني سويف في دوري المجموعتين واحنا محتاجين نقطة عشان نقعد وهم لو اتعادلوا يلعبوا ماتش فاصل ع الهبوط .. عمرو سماكة وقتها كان في تليفونات بني سويف .. نزل خد الكورة عمال يرقص وكان هيجيب ضربة جزاء .. شديت معاه جامد وزعقتله .. وحصل في الماتش حقيقي اتفقنا أن الماتش هيخلص كده .. قعدنا ربع ساعة أو تلت ساعة .. كان الحكم كابتن سمير محمود عثمان سمعنا واحنا بنتكلم قال أنا مسمعتش حاجة هنا غلط وفضلنا تلت ساعة نباصي ورا ونديلهم الكورة وهم يباصوا ويدولنا الكورة لحد ما الماتش خلص”.

المصري والإسماعيلي

وتابع كريم ذكري تصريحاته: “مكنش حاضر الجيل ده، بس انا عاصرت الأجيال اللي حضرت الماتش ده، ماتش الإسماعيلي والمصري لو المصري اتعادل او كسب الأهلي ياخد الدوري، كابتن أنور سلامة هو اللي كان ماسك المصري، عمل اجتماع قبل الماتش وقال للاعيبة مين اللي عاوز الإسماعيلي ياخد الدوري؟ اللي رفع ايده استبعده من الماتش، فيه لعيبة تقال جدا رفعوا أيديهم ومحطهمش في الـ 18، أول دقيقة إيهاب جلال جاب جون للمصري وبعد كده اتعادل عمرو فهيم والإسماعيلي خد الدوري محدش ساب حاجة بس كانت فكرة ذكية من أنور سلامة”.

تصريحات أسامة نبيه

كما تحدث أسامة، نبيه لاعب نادي الزمالك الأسبق في فترة ماضية عن التفويت لصالح الفارس الأبيض خلال مباراة غزل المحلة في نصف نهائي كأس مصر.

وقال أسامة نبيه في تصريحات مع الإعلامي سيف زاهر عبر قناة أون تايم سبورت :”لعبت ضد الزمالك مع غزل المحلة في نصف نهائي الكأس وأتيحت لي فرص للتسجيل في شباك ولكن قلبي لم يطاوعني على التسجيل في شباكه، كاشفا اتيحت لي فرصة للتسجيل في مرمى الزمالك فقلت لإبراهيم حسن وقتها أبعدها حتى لا أسجل في شباك الفريق الأبيض.

وحسب نبيه، فإنه أهدر بعض الفرص في تلك المباراة. بعضها لم يوفق فيها والبعض الآخر «قلبي ماطاوعنيش» على حد وصفه، كما أضاف بأنه في أحد الكرات طالب إبراهيم حسن بتشتيت الكرة من أمامه قبل أن يسجلها.

تصريحات فاروق جعفر

كما فجر فاروق جعفر، قائد نادي الزمالك الأسبق وأحد أساطير القلعة البيضاء مفاجأة بخصوص تفويت المباريات لصالح الزمالك خلال فترة تواجده في الملاعب.

وقال” جعفر” في تصريحاته عبر قناة الزمالك في” برنامج زملكاوي” الذي يقدمه الإعلامي أحمد جمال:” كانت الأندية المصرية في الثمانينات تتجامل من قبل الحكام الأفارقة”.

وتابع :”كنا نجتمع بالحكام قبل المباريات؛ ويسألوننا هل نريد أن يتم إحتساب لنا ركلة جزاء أو طرد لاعب محدد من الفريق المنافس”.

واختتم “جعفر” تصريحاته قائلا :”صعدنا لكأس العالم 90 بالمجاملة ولولا التحكيم لما تأهلنا، وكان يتم تسجيل أهداف في مرمي مصر والحكام لا يحتسبونها عمداً”.

تصريحات رضا عبدالعال

فيما كان لرضا عبدالعال، نصيبه من التصريحات بشأن التفويت في مباريات الزمالك أيضا.

وقال رضا في تصريحات لبرنامج البريمو “انا اتطلب مني مرة تفويت مباراة وأنا في الزمالك وكانت مباراة قصاد السكة الحديد”.

وتابع “كنا واخدين الدوري وقتها، وفاروق جعفر قالنا السكة محتاجة تقعد في الدوري علشان صراع الهبوط كان بين السكة والمقاولون”.

وأضاف “فاروق جعفر خيرنا وقتها ما بين اننا نلعب او منلعبش خالص، ف قولنا منلعبش خالص في المباراة، هو كان عاوز يريحنا في المباراة”.

وواصل رضا عبد العال “فاروق قالنا هنريح في المباراة وإن السكة تتعادل او تكسب في المباراة هي وحظها بقى، قولنا مفيش مشكلة نريح خالص وبلاش نلعب المباراة”.